नेपाली फिल्म क्षेत्रका महानायक नायक राजेश हमाल र माओवादी केन्द्रका अध्यक्ष पुष्पकमल दाहाल ‘प्रचण्ड’ बिच भेट भएको छ ।
माओवादी केन्द्र नजिकका संगीतकार चेतन सापकोटाको पहलमा महानायक हमाल र अध्यक्ष दाहालबिच शुक्रबार बिहान खुमलटार निवासमा भेट भएको हो ।
राजेश हमाल र पुष्पकमल दाहालबिचको भेटमा देशको राजनीतिक अवस्था, कला क्षेत्रको विकासको बिषयमा कुराकानी भएको थियो । तर, भेटमा पार्टी प्रवेश गर्ने वा कुनै राजनीतिक दलमा लागेर राजनीति गर्ने बिषयमा हमालले कुरा नगरेको चेतनले जानकारी दिएका छन् ।
तर, हमालले प्रचण्डसँगको भेटमा सरकारले चाहेको खण्डमा कुनै पनि पदमा बसेर आफूले देशको सेवा गर्न चाहेको बताएका थिए । राजेश हमालको भित्री इच्छा कुनै दलमा लागेर राजनीति गर्ने भन्दा पनि कुनै देशको राजदुत बनेर देशको सेवा गर्ने रहेको वुझिएको छ । हमालले घुमाउरो शैलीमा प्रचण्डसँग यो कुरा व्यक्त गरेका थिए ।
प्रचण्डसँग पहिलो पटक भेट गरेका महानायक हमालले हालसम्म कुनै पनि पार्टीको खुलेर बिरोध या समर्थन गरेका छैनन् ।