गए रातिदेखि पश्चिम नेपालबाट छिरेको पश्चिमी वायुको पछिल्लो प्रभावले आगामी शनिबारसम्म देशभर आंशिकदेखि सामान्य बदली हुने भएको छ । केही स्थानमा हल्का वर्षा र हिमपात हुने भएकाले सावधानी अपनाउन आग्रह गरिएको छ ।
पछिल्लो पश्चिमी न्यूनचापीय प्रणालीको प्रभावका कारण आज सुदूरपश्चिम, कर्णाली, लुम्बिनी र गण्डकी प्रदेशमा सामान्यदेखि पूर्ण बदली हुने छ । बागमती, मधेस प्रदेश र प्रदेश नम्बर १ मा आंशिकदेखि सामान्य बदली हुने मौसम पूर्वानुमान महाशाखाले जनाएको छ ।
भोलि देशैभर सामान्यदेखि पूर्ण बदली रहने र शनिबार पनि त्यस्तै हुने भएकाले चिसो हुने बताइएको छ । आगामी तीन दिन देशका उच्च पहाडी तथा हिमाली भूभागका थोरै स्थानमा हल्का हिमपातको सम्भावना छ । त्यसबाट हुने चिसोबाट बच्न महाशाखाले अनुरोध गरेको हो ।
आज पनि केही स्थानमा हल्का हिमपातको सम्भावना रहेको छ भने पहाडी तथा तराईका धेरै स्थानमा मेघगर्जन–चट्याङसहित हल्कादेखि मध्यम वर्षाको सम्भावना रहेको बताइएको छ ।
शुक्रबार पहाडी तथा तराईका धेरै स्थानमा मेघगर्जन, चट्याङ–असिनासहित हल्कादेखि मध्यम वर्षाको सम्भावना छ । गण्डकी तथा लुम्बिनी प्रदेशको एक वा दुई स्थानमा ठूलै वर्षा हुने महाशाखाको अनुमान छ ।
