दक्षिण भारतीय चलचित्र ‘थिरिमाली’ मा स्वस्तिमा खड्का सहित अन्य दुई नेपाली पनि कलाकार देखिने भएका छन् । चलचित्रमा अभिनेत्री स्वस्तिमा खड्का, अभिनेता/निर्देशन माओत्से गुरुङ र थिएटर आार्टिस्ट उमेश तामाङको अभिनय रहनेछ ।
अनन्या फिल्मस् निर्माण कम्पनीका एक प्रतिनिधिले नेपालबाट यी तीन कलाकार हुने पुष्टि गरेका हुन् । साथै अभिनेता गुरुङले पनि यस चलचित्रमा देखिन लागेको पक्का भइसकेको जानकारी गराएका छन् । “निर्माण टिमसँग कुरा भइसकेको छ । म यस चलचित्रमा देखिन लागेको खबर पक्का हो ।”
दक्षिण भारतीय कम्पनी एन्जल मारिया सिनेमाज र नेपालका तर्फबाट अनन्या फिल्मस्द्वारा निर्माण हुन लागेको हो । राजीव सेट्टीले निर्देशन गर्ने यस फिल्म मलायलमबाहेक हिन्दी र नेपाली भाषामा पनि निर्माण हुँदै छ ।
नेपालको कपिराइट अधिकार अनन्या फिल्मस्ले लिएको छ । नेपालको काठमाडौं र मुस्ताङमा हुने छायांकनको जिम्मा पनि अनन्या फिल्मस्ले लिएको छ । “१५ मार्चदेखि फ्लोरमा जाने योजना छ । अब हेरौं तोकिएको समयमा जान सकिन्छ कि सकिँदैन,” अनन्या फिल्मले मार्चको मध्यतिरबाट चलचित्र छायांकनमा जाने तयारीमा रहेको जनाएको छ ।
अभिनेत्री स्वस्तिमालगायत साउथकी अभिनेत्री पनि हुने तर स्वस्तिमाको पनि महत्त्वपूर्ण भूमिका रहने उनले बताएका छन् ।
