हरिवंश आचार्य स्टारर फिल्म ‘महापुरुष’ले घरेलु बक्स अफिसमा हालसम्म १० करोड रुपैयाँ बढीको ग्रस कमाइ गरेको छ । प्रदर्शनको ३१ औं दिन शनिबारसम्म फिल्मले १० करोड १४ लाख रुपैयाँ कमाएको हो ।
फिल्मले दुई अंकको कमाइ गरेपछि निर्माताले आइतबार काठमाडौंमा पत्रकार सम्मेलन गर्दै केक काटेर सफलताको खुसीयाली मनाए । कार्यक्रममा फिल्मका निर्माता, निर्देशक, कलाकार र प्राविधिक सहभागी थिए ।
अहिले अमेरिकामा रहेका अभिनेता हरिवंश आचार्यले छोरा मोहितवंशमार्फत दर्शकलाई धन्यवाद दिए ।
कार्यकारी निर्माता रविन्द्रसिंह बानियाँले महापुरुषको सफलतामा दर्शकसहित पर्दा पछाडि बसेर साथ दिने प्राविधिकको योगदान रहेको बताए । अभिनेता राजाराम पौडेलले नेपाली कला, संस्कृति र धर्मलाई नेपालीले नै बचाउनुपर्ने बताए ।
प्रौढ पुरुषको एक्लोपन र पुनर्विवाहको कथा प्रस्तुत गर्ने फिल्म चुनाव र विश्वकप फुटबलको माहोलमा पनि अहिले राम्रै अकुपेन्सीसहित चलिरहेको छ । फिल्ममा हरिवंशसहित गौरी मल्ल, अरुण क्षेत्री र अञ्जना बराइलीको प्रमुख अभिनय छ ।
षट्कोण आर्ट्सले यसपछि फिल्म महाजात्रा निर्माण गर्ने जनाएको छ । यो ब्यानरकै अर्को फिल्म ‘डाकिनी’ पनि प्रदर्शनको तयारीमा छ ।
