Homeसमाचारआनीबानीमा सुधार देखिएका चारवटा बाघलाई जंगलमा छाडियो

आनीबानीमा सुधार देखिएका चारवटा बाघलाई जंगलमा छाडियो

चितवन राष्ट्रिय निकुन्जले चारवटा नरभक्षी बाघलाई पुनः प्राकृतिक वासस्थानमै छाडेको छ । यसअघि मानिसलाई आक्रमण गरेपछि निकुन्जले नियन्त्रणमा राखेको चार वटा बाघको आनीबानी सुध्रिएको भन्दै पुनः जंगलमै छाडेको हो ।

छाडिएको बाघलाई मानिसको नजिक राखेर बानी–व्यवहार अध्ययन गरेपछि मात्र छाडिएको निकुञ्जका प्रमुख संरक्षण अधिकृत हरिभद्र आचार्यले जानकारी दिए ।

चितवन राष्ट्रिय निकुञ्जका सूचना अधिकारी एवं सहायक संरक्षण अधिकृत गणेशप्रसाद तिवारीले मानिससँग जम्काभेट भएर आक्रमण गरेका बाघलाई मात्र छाडिएको जानकारी दिए । जनदबाबमा समातेका सबै बाघ नरभक्षी नहुने भन्दै उनले बाघको आनीबानी, उमेर, व्यवहारको अध्ययन गरेर नरभक्षीबाहेकका बाघलाई जंगलमा लगेर छाड्ने गरेको जानकारी दिए ।

निकुन्जले नियन्त्रणमा लिएका तीन वटा नरभक्षी बाघको भने आनीबानीमा सुधार नआएको भन्दै अझै नियन्त्रणमै राखिएको छ । यसअघि निकुन्ज आसपास र केही अन्य जिल्लामा समेत मान्छे मारेपछि ती सबै बाघलाई निकुन्जले नियन्त्रण लिई खोरमा राखेको थियो ।

निकुञ्जले यस वर्ष सात वटा बाघ नियन्त्रणमा लिएकामा चार बाघ छाडेको जनाएको छ । निकुञ्जका प्रमुख संरक्षण अधिकृत आचार्यका अनुसार चालु आर्थिक वर्ष २०७९/८० मा चार बाघ छाडिए पनि अझै तीन वटा बाघ निकुञ्जको खोरमै रहेका छन् ।

आनीबानी सुध्रिएको भन्दै जंगलमा छाडिएका बाघको घाँटीमा स्याटेलाइट कलर जडान गरिएको छ । जंगलमा छाडिएका बाघको सोही कलरमार्फत् निगरानी गर्न सकिने संरक्षण अधिकृत आचार्यले जानकारी दिए । बाघको घाँटीमा स्याटेलाइट कलर जोडेपछि उक्त बाघ कहाँ कुन अवस्थामा छ भन्ने कुरा सफ्टवेयरको माध्यमबाट निकुञ्जमै बसेर जानकारी लिन सकिन्छ ।

खोरमा बाँकी रहेका तीनवटामध्ये एउटा बाघ बाँकेबाट ल्याइएको हो भने दुई बाघ चितवन राष्ट्रिय निकुञ्ज आसपासका क्षेत्रबाट नियन्त्रणमा लिइएको हो ।

निकुञ्जको मुख्यालय कसारमा दुई र निकुञ्जको पूर्वी सेक्टर सौराहामा दुई गरी चारवटा मात्रै बाघ राख्न मिल्ने खोर छन् । थप केही खोर बन्ने चरणमा छन् । चालु आर्थिक वर्षमा मात्र चितवनमा बाघको आक्रमणबाट १६ जनाको मृत्यु भइसकेको छ भने ११ बढी मानिस घाइते भएका छन् ।

TLN Post
TLN Post
सपूर्ण नेपाली सम्पूर्ण समाचार,म्युजिक भिडियो, फिल्म र अन्य खबरहरु र साथसाथै म्युजिक र फिल्महरु को रिभ्यु | साथै यहाँहरुको म्युजिक भिडियो र फिलिमहरुको प्रोमोसन गर्नु परेमा हामी लाई साम्झनुहोस |

LEAVE A REPLY

Please enter your comment!
Please enter your name here

Must Read