यही फेब्रुअरी ११ देखि ओमानमा हुने नेपाल सहभागी चारदेशीय टी-२० सिरिजको प्रत्यक्ष प्रशारण हिमालय टेलिभिजनले गर्ने भएको छ । सिरिजको प्रशारण अधिकार पाएको एडप्याडले बुधबार एक विज्ञप्ति निकाल्दै सिरिजको प्रत्यक्ष प्रशारण हिमालय टेलिभिजनले गर्ने जनाएको छ ।
प्रतियोगिता प्रत्यक्ष प्रसारण नेपालमा हिमालय एचडी टेलिभिजनबाहेक, युट्युबमा ओएसआर स्पोर्टस र दराज एपमार्फत हेर्न सकिने छ । आईसीसी टी-२० विश्वकप ग्लोबल क्वालिफायरअघि नेपालले उक्त सिरिज खेल्दैछ । सिरिजमा नेपालसहित आयरल्यान्ड, युएई र ओमान रहेका छन् । सिरिजको पहिलो खेलमा नेपालले ओमानविरुद्ध फेब्रुअरी ११ मा खेल्नेछ ।
यस्तै, दोसो खेल युएईसँग फेब्रुअरी १२ मा खेल्दा नेपालले फेब्रुअरी १४ मा आयरल्यान्डसँग खेल्नेछ । यस सिरिजलाई टी-२० विश्वकप क्वालिफायरको अभ्यास खेलको रूपमा लिइएको छ । विश्वकप क्वालिफायरको समूह ‘बी’ मा रहेको नेपालले पहिलो खेल १८ फेब्रुअरीमा ओमानविरुद्ध खेल्नेछ । त्यस्तै, दोस्रो खेलमा नेपालले १९ फेब्रुअरीमा फिलिपिन्सको सामना गर्नेछ ।
तेस्रो खेलमा नेपालले २१ फेब्रुअरीमा क्यानडाविरुद्ध खेल्ने तालिका छ । यो समूहबाट शीर्ष दुई टोली सेमिफाइनलमा जानेछन् । समूह ‘बी’ मा आयरल्याण्ड, यूएई, बहराइन र जर्मनी रहेका छन् । यो ग्रुपबाट पनि दुई टिम सेमिफाइनलमा प्रवेश गर्ने छन् ।
२२ फेब्रुअरीमा हुने सेमिफाइनलबाट फाइनलमा पुग्ने २ टोली यही वर्षको अक्टोबर/नोभेम्बरमा अष्ट्रेलियामा हुने विश्वकपमा छनोट हुनेछन् । सन् २०१४ यता नेपालले विश्वकप खेल्न पाएको छैन । यसपालि टिम नयाँ जोसका साथ दोस्रोपटक विश्वकपमा छनोट हुने लक्ष्य बोकेर ओमान उडेको छ ।
चार देशीय सिरिजअन्तर्गत ओमानसँगको पहिलो टी–२० खेलमा नेपालले टस जितेर फिल्डिङ रोजेको छ । नेपाल र ओमानबीचको खेल अल अमरेत क्रिकेट मैदानमा ३ः४५ बजेबाट सुरु भैसकेको छ । नेपाली टिमको कप्तानी सन्दीप लामिछानेले गर्दै छन् ।
नेपालको प्लेइङ-११ : आसिफ शेख, प्रदीप ऐरी, ज्ञानेन्द्र मल्ल, दीपेन्द्रसिंह ऐरी, शरद भेषवाकर, आरिफ शेख, अविनाश बोहरा, कमलसिंह ऐरी, सन्दीप लामिछाने (कप्तान), विवेक यादव र सागर ढकाल ।