Homeसमाचारलता मंगेशकरको निधनपछि भारतमा दुई दिन शोक बिदा

लता मंगेशकरको निधनपछि भारतमा दुई दिन शोक बिदा

गायिका लता मंगेशकरको निधनमा भारत सरकारले शोक बिदा दिएको छ। भारतीय गृह मन्त्रालयले आइतबार प्रेस विज्ञप्ती जारी गर्दै आइतबार र सोमबार बिदा दिन निर्देशन दिएको हो।

आइतबारदेखि सोमबारसम्म देशभर राष्ट्रिय झण्डालाई आधा झुकाइने मन्त्रालयलाई उद्धृत गर्दै इकोनमिक टाइम्सले जनाएको छ। ‘केन्द्र सरकारले स्वर्गीय लता मंगेशकरको सम्मानमा फेब्रुअरी ६ देखि ७ गतेसम्म दुई दिन शोक मनाउने र यस अवधिमा कुनै औपचारिक मनोरञ्जन नगर्ने निर्णय गरिएको छ,’ विज्ञप्तीमा उल्लेख छ।

मंगेशकरको शनिबार राति उपचारका क्रममा निधन भएको हो। उनी ९२ वर्षकी थिइन्। केही दिनदेखि बिरामी परेकी मंगेशकरलाई अस्पताल भर्ना गरिएको थियो। उनलाई कोरोनाभाइरसको संक्रमण पनि देखिएको थियो।

मंगेशकरको जन्म सन् १९२९ सेप्टेम्बरमा मध्य प्रदेशको इन्दोर सहरमा भएको थियो। उनको परिवारको पृष्ठभूमि शास्त्रीय संगीतको थियो। औपचारिक शिक्षा हासिल नगरेकी मंगेशकरले भने बलिउड सिनेमाका लागि गीत गाएकी थिइन्। जुन कुरा उनको परिवारलाई सुरूमा मन नपरेको उनले एक अन्तर्वार्ताका क्रममा बताएकी थिइन्।

सन् १९४९ मा उनले महल भन्ने सिनेमा लागि उनले पहिलो पटक गीत गाएकी थिइन्। त्यही गीतले उनलाई चर्चा चुलिएको थियो। आफ्नो जीवनकालमा मंगेशकरले ३६ भाषामा ३० हजार बढी गीत गाएकी थिइन्। मंगेशकरले नेपाली चलचित्रका लागि पनि गीत गाएकी थिइन्।

राजा महेन्द्रले लेखेको ‘आकाशका तिरमिरे तारा म गन्न सक्दिनँ … ’ गीतमा मंगेशकरले स्वर भरेकी थिइन्। अरू नेपाली गायक/गायिकासँग पनि उनले गीत गाएकी छन्।मंगेशकरले भारतका प्रतिष्ठित भारत रत्न, पद्मभुषण, दादासाहेब फाल्के अवार्डलगायत पुरस्कार र सम्मान पाएकी थिइन्।

मंगेशकरको निधनमा भारतीय प्रधानमन्त्री नरेन्द्र मोदीले गहिरो दु:ख व्यक्त गरेका छन्।

TLN Post
TLN Post
सपूर्ण नेपाली सम्पूर्ण समाचार,म्युजिक भिडियो, फिल्म र अन्य खबरहरु र साथसाथै म्युजिक र फिल्महरु को रिभ्यु | साथै यहाँहरुको म्युजिक भिडियो र फिलिमहरुको प्रोमोसन गर्नु परेमा हामी लाई साम्झनुहोस |

LEAVE A REPLY

Please enter your comment!
Please enter your name here

Must Read