प्रहरीकाे केन्द्रीय अनुसन्धान ब्युराे(सिआइबी) ले बालुवाटार जग्गा प्रकरणमा तीन सय जनाभन्दा बढीविरुद्ध पक्राउ पूर्जी जारी गरेकाे छ ।
ब्युराेले कांग्रेस नेता विजयकुमार गच्छदार, अख्तियार दुरुपयाेग अनुसन्धान आयाेगका पूर्व प्रमुख आयुक्त दीपकुमार बस्न्यात, पूर्वसचिव नारायणगाेपाल मलेगाेलगायतलाई पक्राउ गर्न अदालतबाट आदेश पाएकाे हाे ।
पक्राउ पूर्जी जारी भएकाहरूलाई पक्राउ गर्न ब्युराे लागिरहेकाे ब्युरोका निर्देशक धिरजप्रताप सिंहले जानकारी दिए ।
यसभन्दा अगाडि जग्गा प्रकरणमा शाेभाकान्त ढकाल, रामकुमार सुवेदी र माधवी सुवेदी पक्राउ परिसकेका छन् । उनीहरू अहिले थुनामा छन् ।
अनुसन्धान आयाेगका पूर्वप्रमुख आयुक्त बस्न्यातसँगै उनका छाेरा कमल बस्नेत, ज्वाइँद्वय प्रज्जवल अधिकारी र मनाेज सुवेदीमाथि शुद्धीकरण अनुसन्धान विभागले अनुसन्धान गरिरहेकाे छ ।
ब्युराे प्रवक्ता प्रहरी उपरीक्षक श्यामकुमार महताेले अनुसन्धानकाे क्रममा दाेषी देखिएकालाई थप अनुसन्धान गर्न पक्राउ पूर्जी जारी गरिँदै आएकाे बताए ।
‘याे मुद्धा सानाे हाेइन, अनुसन्धान गर्दै जाँदा जाे-जाे मुछिन्छन् उनीहरूलाई नियन्त्रणमा लिएर थप अनुसन्धान गरिरहेका छाैं,’ उनले भने ।
बालुवाटार जग्गा प्रकरणमा नेकपा एमाले नेता विष्णु पौडेल पनि मुछिएका थिए । तत्कालीन प्रधानमन्त्री केपी शर्मा ओलीले उनी ठगिएको भन्दै उक्त आरोपबाट पन्छाउन खोजेका थिए । बालुवाटार जग्गा प्रकरण लामो समयदेखि निकै चर्चाको विषय बनेको छ । सरकारले उक्त प्रकरणमाथि अनुसन्धान गर्ने जिम्मा सिआइबीलाई दिएको थियो ।
