Home समाचार २० मन्त्रीका लागि १५६ सांसद दौडमा, शिर्ष नेतालाई चुनौती

२० मन्त्रीका लागि १५६ सांसद दौडमा, शिर्ष नेतालाई चुनौती

नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धन जोगाउन मुश्किल पर्ने संकेत गरेका छन् । उनले गठबन्धन भत्काउने कोशिश हुन थालेको मात्र भनेनन् आफ्नै पार्टीभित्र मन्त्रीका आकांक्षी धेरै भएर व्यवस्थान कठिन भएको खुलासा गरेका छन् ।

प्रचण्डले ४९ जना सांसदमध्ये सबैजसो मन्त्रीका आकांक्षी भएको खुलाए । माओवादीबाट अहिले सरकारमा २ जना मन्त्री छन् । उसले थप ३ देखि ४ मन्त्रालय पाउने सम्भावना छ । त्यसका लागि निकै चर्को प्रतिष्पर्धा छ । प्रचण्डनिवास खुमलटारमा मन्त्री बनाइदिन भन्दै धाउनेहरु बढेका छन् ।

देउवाले विश्वासको मतको पक्षमा १६५ मत प्राप्त गरेका थिए । त्यसमध्ये उनी आफै, माओवादी अध्यक्ष प्रचण्ड, एमाले वरिष्ठ नेता माधवकुमार नेपाल, जसपा अध्यक्ष उपेन्द्र यादव, महन्थ ठाकुर र संघीय परिषद्का अध्यक्ष डा. बाबुराम भट्टराई पनि छन् । प्रचण्ड, माधव नेपाल, महन्थ ठाकुर र डा. बाबुराम भट्टराई मन्त्रीको दौडमा छैनन् । राष्ट्रिय जनमोर्चा सरकारमा नजाने भएको छ । दुर्गा पौडेलले देउवाको पक्षमा मतदान गरेकी थिइन् । देउवासहित ५ सांसद सरकारमा गइसकेका छन् । यसरी हेर्दा कम्तिमा १५६ प्रतिनिधि सभाका सांसद मन्त्रीको दौडमा छन् ।

माओवादीमा मात्र नभई सत्तारुढ नेपाली काँग्रेसमा पनि चर्को प्रतिष्पर्धा छ । ६१ सांसद रहेको काँग्रेसमा प्रधानमन्त्री शेरबहादुर देउवाका अलावा २ मन्त्री छन् । गृहमा बालकृष्ण खाँड र कानुनमा ज्ञानेन्द्रबहादुर कार्की छन् । सत्ता गठबन्धन दलहरुले कम्तिमा १५ देखि १८ मन्त्रालय मागेकाले देउवालाई आफ्नो पार्टीभित्र व्यवस्थापन सजिलो छैन ।

काँग्रेसले अधिकतम ७ जनासम्म मन्त्री थप्न सक्छ । त्यसमा पनि वरिष्ठ नेता रामचन्द्र पौडेल, कोइराला परिवार, पूर्वमहामन्त्रीद्वय प्रकाशमान सिंह र कृष्णप्रसाद सिटौला पक्षधरलाई व्यवस्थापन गर्नुपर्ने चुनौती छ । देउवानिकटस्थहरु पनि मन्त्रीका आकांक्षी छन् ।

महाधिवेशनको मुखमा निकटस्थलाई चिढ्याएमा देउवालाई समस्या पर्न सक्छ । अर्कोतर्फ, उनले मन्त्री पदबाटै आफ्नो विरोधी समूहबाट केही नेता तान्ने रणनीति बनाउन सक्छन् । यसका लागि पनि उनलाई व्यवस्थापनको चुनौती छ ।
जनता समाजवादी पार्टीको महन्थ ठाकुर र उपेन्द्र यादव समूह दुवै सरकारमा जान चाहेका छन् । यादव गठबन्धनमा नै छन् । ठाकुरले पनि देउवालाई विश्वासको मत दिएका छन् । यी दुई समूहले गरी कम्तिमा ५ मन्त्रालय माग्न सक्छन् । जसपाको डा. बाबुराम भट्टराई पक्षधरको पनि मन्त्री दाबी हुन सक्छ ।

मन्त्रीकै लागि जसपाको ठाकुर समूहभित्र मात्र नभई यादव समूहभित्र पनि विवाद आउने सम्भावना छ । मन्त्री नपाएकाहरुले गुट परिवर्तन गर्न सक्छन् । ३२ सांसद रहेको जसपाभित्र ठूलै विवादको सम्भावना बढेको छ ।

नेकपा एमालेको माधवकुमार नेपाल समूह पनि सरकारमा जाने सम्भावना छ । उक्त समूहमा मन्त्री बन्नकै लागि गुट परिवर्तन गर्नेहरु छन् । बामदेव गौतम, प्रेम आले, किसान श्रेष्ठलगायत मन्त्रीका आकांक्षी छन् । गौतम उपप्रधानमन्त्रीसहित सरकारमा जान खोजिरहेका छन् ।

एमालेभित्रको विवादमा आफ्नो समूहमा बढीभन्दा बढी सांसद तान्न पनि नेपाललाई बढी मन्त्रालय चाहिएको छ । उनले कम्तिमा ८ मन्त्री मागेको बुझिएको छ । त्यो संख्यामा मन्त्रालय पाएपनि गुट व्यवस्थापन गर्न नेपाललाई कठिन छ । मन्त्री बन्नकै लागि नेपाल समूहमा विवाद हुने अवस्था बनेको छ ।

संविधान अनुसार प्रधानमन्त्रीसहित २५ मन्त्री रहने व्यवस्था छ । सत्ता गठबन्धनका माओवादीले ५ देखि ६, जसपाले ५ देखि ६ र माधवकुमार नेपाल समूहले ७ देखि ८ मन्त्रालय मागेको अवस्थामा काँग्रेस ७ भन्दा कम मन्त्रालयमा चित्त बुझाउनुपर्ने अवस्थामा रहन सक्छ ।

सत्ता गठबन्धनका दलभित्र बढीभन्दा बढी सांसदलाई मन्त्री बनाउन संविधान संशोधन गरी मन्त्रालय बढाउने र फुटाउने सम्मको कदम पनि हुन सक्छ । त्यस्तो संकेतहरु देखिएका छन् । तर, मन्त्रालय बढाएर मात्र व्यवस्थापन सजिलो छैन । आकांक्षीहरु झन् बढ्न सक्छन् । मन्त्री बन्नकै लागि गठबन्धन दलभित्र विवाद बढ्ने देखिन्छ । गठबन्धनका दलहरुभित्र पनि उत्तिकै विवाद बल्झने सम्भावना छ । यसको व्यवस्थापन गर्न प्रधानमन्त्री शेरबहादुर देउवा, माओवादी अध्यक्ष प्रचण्ड, एमाले वरिष्ठ नेता माधवकुमार नेपाल, जसपा अध्यक्षद्वय महन्थ ठाकुर र उपेन्द्र यादवलाई हम्मे पर्न सक्छ ।

TLN Post
सपूर्ण नेपाली सम्पूर्ण समाचार,म्युजिक भिडियो, फिल्म र अन्य खबरहरु र साथसाथै म्युजिक र फिल्महरु को रिभ्यु | साथै यहाँहरुको म्युजिक भिडियो र फिलिमहरुको प्रोमोसन गर्नु परेमा हामी लाई साम्झनुहोस |

LEAVE A REPLY

Please enter your comment!
Please enter your name here

Must Read